Fréttir

Niðurstaða ársfundar 2022

27.05.2022

Ársfundur Festu lífeyrissjóðs var haldinn 19. maí sl. á Grand Hótel Reykjavík. Á fundinum var m.a. kynnt ársskýrsla sjóðsins sem og ársreikningur fyrir árið 2021. Þar kom m.a. fram að sjóðfélagar sem greiddu iðgjöld á árinu voru samtals 17.962. Iðgjöld til sjóðsins námu tæplega 11,3 milljörðum króna og hækkuðu um 5,0% frá árinu 2020. Lífeyrisgreiðslur á árinu námu tæplega 5,3 milljörðum króna og hækkuðu um 11,7% frá fyrra ári. Heildarfjöldi lífeyrisþega var 11.148.

Heildareignir sjóðsins í árslok 2021 voru samtals rúmlega 247,5 milljarðar króna, hækkuðu um 19,8% frá fyrra ári eða tæplega 41  milljarð króna. Eign samtryggingardeildar var rúmlega 246,3 milljarðar og séreignardeildar um 1,2 milljarðar króna. Hrein nafnávöxtun samtryggingardeildar sjóðsins var 16,4%, hrein raunávöxtun var 11,0%. Hrein nafnávöxtun séreignardeildar sjóðsins, sparnaðarleiðar 1 var 3,4%, hrein raunávöxtun var -1,4%. Hrein nafnávöxtun séreignardeildar sjóðsins, sparnaðarleiðar 2, var 14,4%, hrein raunávöxtun var 9,1%. Tryggingafræðileg staða var þannig að skuldbindingar sjóðsins voru 2,6% umfram eignir sjóðsins í árslok 2021. Fyrir þá sem vilja kynna sér nánar niðurstöðu úr rekstri sjóðsins á árinu 2021 má finna ársreikning hans í heild sinni hér á heimasíðunni.

Á fundinum voru lagðar fram tillögur að breytingum á samþykktum sjóðsins en afgreiðslu þeirra frestað til aukaársfundar sem fyrirhugað er að halda í september nk.

 

Stjórnarkjör

Eftir fundinn er stjórn Festu lífeyrissjóðs þannig skipuð:

Fulltrúar aðildarsamtaka launamanna:

  • Anna Halldórsdóttir – aðalmaður
  • Eyrún Jana Sigurðardóttir - aðalmaður
  • Þór Hreinsson - aðalmaður
  • Silja Eyrún Steingrímsdóttir - varamaður

Fulltrúar samtaka atvinnulífsins:

  • Kristín Magnúsdóttir – aðalmaður
  • Sigurður Ólafsson - aðalmaður
  • Örvar Ólafsson - aðalmaður
  • Einar Steinþórsson - varamaður

Á fyrsta fundi nýrrar stjórnar sem haldinn var í kjölfar ársfundar, skipti stjórn þannig með sér verkum að Anna Halldórsdóttir, fulltrúi aðildarsamtaka launamanna, var kosinn formaður og Sigurður Ólafsson, fulltrúi samtaka atvinnulífsins, var kosinn varaformaður.

PricewaterhouseCoopers ehf. ytri endurskoðandi sjóðsins

Samþykkt var tillaga stjórnar um að endurskoðunarskrifstofa  PricewaterhouseCoopers ehf. yrði ytri endurskoðandi sjóðsins fyrir árið 2022.