Iðgjöld

Samkvæmt lögum er öllum launamönnum rétt og skylt að eiga aðild að lífeyrissjóði viðkomandi starfsstéttar.  Atvinnurekendum er sömuleiðis rétt og skylt að halda eftir iðgjaldi af launum launþega og skila því til lífeyrissjóðsins ásamt mótframlagi sínu. 

Iðgjald til lífeyrissjóðsins frá 1. janúar 2007 er 12% af heildarlaunum, þ.e. tekjum af dagvinnu, yfirvinnu, álagsgreiðslum og orlofi. Sjóðfélagar á aldrinum 16 - 70 ára greiða 4% af öllum launum sínum til sjóðsins og launagreiðendur 8%. Mótframlag launagreiðanda hækkar í 8,5% frá og með 1. júlí 2016  vegna þeirra sem eru aðilar að kjarasamningi ASÍ og SA frá 21. janúar 2016. Mótframlag launagreiðanda hækkar í 10% frá og með 1. júlí 2017  vegna þeirra sem eru aðilar að kjarasamningi ASÍ og SA frá 21. janúar 2016.

Yfirlit yfir móttekin iðgjöld eru send sjóðfélögum tvisvar á ári og þurfa sjóðfélagar að gera athugasemdir við yfirlitið innan 60 daga frá útsendingardegi ef vanhöld sýnast á iðgjaldaskilum.  Nauðsynlegt er að sjóðfélagar beri þessi yfirlit saman við launaseðla sína til að tryggja rétt skil.