26.03.2026
Ársuppgjör Festu lífeyrissjóðs 2025
Stjórn Festu lífeyrissjóðs hefur samþykkt ársreikning sjóðsins fyrir árið 2025. Til upplýsinga fyrir sjóðfélaga verða hér birtar helstu niðurstöðutölur ársreikningsins. Ársreikningurinn mun verða birtur í heild sinni á vefsíðu sjóðsins í aðdraganda ársfundar sjóðsins sem fyrirhugað er að halda mánudaginn 4. maí nk.
Fjöldi sjóðfélaga sem greiddu iðgjöld á árinu 2025 voru samtals 20.586 og jókst um tæp 2% milli ára. Fjöldi sjóðfélaga með réttindi í árslok 2025 var 116.382. Launagreiðendur voru 3.258.
Iðgjöld til sjóðsins námu um 18 milljörðum króna og hækkuðu um 5,7% á árinu.
Lífeyrisgreiðslur á árinu námu um 9,1 milljörðum króna og hækkuðu um 10,5% á árinu. Heildarfjöldi lífeyrisþega var 13.211 en þeim fjölgaði um 4% á árinu.
Hrein eign sjóðsins í árslok 2025 nam tæplega 347 milljörðum króna og jókst um 8,3% frá fyrra ári eða um tæpa 27 milljarða króna. Hrein eign samtryggingardeildar nam 344,4 milljörðum króna og séreignardeilda tæplega 2,2 milljörðum króna.
Hrein nafnávöxtun samtryggingardeildar sjóðsins var jákvæð um 5,3% og hrein raunávöxtun var jákvæð um 1,5%, en verðbólga mældist 3,7% yfir árið. Tryggingafræðileg staða samtryggingardeildar var neikvæð, en skuldbindingar voru 2,6% umfram eignir sjóðsins í árslok 2025.
Hrein nafnávöxtun sparnaðarleiðar 1, var jákvæð um 4,6% og hrein raunávöxtun var jákvæð um 0,9%. Hrein nafnávöxtun sparnaðarleiðar 2, var jákvæð um 5,4% og hrein raunávöxtun var jákvæð um 1,6%.
Eins og að framan greinir er fyrirhugað að halda ársfund sjóðsins mánudaginn 4. maí nk. Dagskrá fundarins verður auglýst á heimasíðu sjóðsins og í dagblöðum.
frá lífeyrismál.is
