26.05.2026
Niðurstaða ársfundar 2026
Ársfundur Festu lífeyrissjóðs var haldinn 4. maí sl. klukkan 18:00 á Grand Hótel Reykjavík.
Á fundinum var m.a. kynnt ársskýrsla sjóðsins ásamt ársreikningi fyrir árið 2025. Þar kom fram að sjóðfélagar sem greiddu iðgjöld á árinu voru samtals 20.586. Iðgjöld til sjóðsins námu um 18 milljörðum króna og hækkuðu um 5,7% á árinu. Lífeyrisgreiðslur á árinu námu 9,1 milljarði króna og hækkuðu um 10,5% frá fyrra ári. Heildarfjöldi lífeyrisþega var 13.211.
Hrein eign sjóðsins í árslok 2025 var samtals um 346,5 milljarðar króna og jókst um 8,3% milli ára eða um 26,6 milljarða króna. Hrein eign samtryggingardeildar var 344,3 milljarðar og séreignardeildar um 2,2 milljarðar króna. Hrein nafnávöxtun samtryggingardeildar sjóðsins var 5,3% og hrein raunávöxtun 1,5%. Hrein nafnávöxtun sparnaðarleiðar 1, séreignardeildar sjóðsins, var 5,0% og hrein raunávöxtun 1,3%. Hrein nafnávöxtun sparnaðarleiðar 2, séreignardeildar sjóðsins, var 5,5% og hrein raunávöxtun 1,7%.
Tryggingafræðileg staða var þannig að skuldbindingar sjóðsins voru 2,6% umfram eignir sjóðsins í árslok 2025. Þeir sem vilja kynna sér nánar niðurstöður úr rekstri sjóðsins á árinu 2025 geta fundið ársreikning hans í heild sinni hér á heimasíðunni.
Á fundinum voru lagðar fram tillögur að breytingum á samþykktum sjóðsins og voru þær samþykktar. Breytingar á samþykktum sjóðsins öðlast gildi eftir að hafa hlotið staðfestingu fjármála- og efnahagsráðuneytisins. Hægt er að kynna sér breytingarnar á samþykktum sjóðsins hér.
Jafnframt var lagt til að endurskoðunarskrifstofan PricewaterhouseCoopers ehf. sjái um ytri endurskoðun á ársreikningi sjóðsins fyrir árið 2026 og var tillagan samþykkt.
Hér má sjá ársskýrslu 2025.
Stjórnarkjör
Eftir fundinn er stjórn Festu lífeyrissjóðs þannig skipuð:
Fulltrúar aðildarsamtaka launamanna:
- Eyrún Jana Sigurðardóttir – aðalmaður
- Silja Eyrún Steingrímsdóttir – aðalmaður
- Þór Hreinsson – aðalmaður
- Anna Ágústa Halldórsdóttir – varamaður
Fulltrúar samtaka atvinnulífsins:
- Halldór Kristinsson – aðalmaður
- Steinþór Skúlason – aðalmaður
- Sara Lind Guðbergsdóttir – aðalmaður
- Einar Steinþórsson – varamaður
Á fyrsta fundi nýrrar stjórnar, sem haldinn var í kjölfar ársfundar, skipti stjórn þannig með sér verkum að Silja Eyrún Steingrímsdóttir, fulltrúi aðildarsamtaka launamanna, var kosin formaður og Halldór Kristinsson, fulltrúi samtaka atvinnulífsins, var kosinn varaformaður.
frá lífeyrismál.is
