13.06.2025
Fyrirliggjandi frumvarp leiðir óhjákvæmilega til skerðingar á ellilífeyri
Festa lífeyrissjóður hefur sent Alþingi umsögn vegna fyrirliggjandi frumvarps um breytingu á lögum um skyldutryggingu lífeyrisréttinda og starfsemi lífeyrissjóða er varðar víxlverkun örorkulífeyrisgreiðslna.
Í umsögninni kemur fram að verði frumvarpið að lögum muni það leiða til verulegrar aukningar á greiðslum sjóðsins vegna örorkulífeyris til framtíðar. Þannig felur frumvarpið í sér eignatilfærslu frá ellilífeyrisþegum til örorkulífeyrisþega, enda ljóst að auknar örorkugreiðslur hafi neikvæð áhrif á tryggingafræðilega stöðu sjóðsins.
Fyrir liggur að aukning á greiðslum örorkulífeyris munu hafa áhrif til lækkunar á þeim fjármunum sem ætlaðir eru til greiðslu ellilífeyris og kemur verst niður á þeim sjóðum sem hafa þunga örorkubyrði. Hér reynir því á grundvallarforsendur sem liggja að baki skyldutryggingu lífeyrisréttinda og eignaréttarvörðum réttindum og jafnræði sjóðfélaga.
Bent er á það í umsögninni að frumvarpið muni að óbreyttu leiða til þess að fremur stór hópur muni verða með hærri tekjur á örorkulífeyri en hann var með áður á vinnumarkaði.
Leiði breytingarnar til fjölgunar örorkulífeyrisþega mun það auka kostnað sjóðsins enn meira, sem myndi leiða til enn frekari skerðingar á ellilífeyrisgreiðslum. Samkvæmt áætlun sjóðsins og tryggingastærðfræðings hans gætu neikvæð áhrif á getu sjóðsins til greiðslu á ellilífeyri í framtíðinni numið um eða yfir 7,5%.
Að mati sjóðsins er þörf á frekari greiningum og mati á áhrifum frumvarpsins á hagsmuni sjóðfélaga einstakra lífeyrissjóða. Ef vilji stjórnvalda er til breytinga þarf á sama tíma að leggja til viðeigandi mótvægisaðgerðir eða annars konar kerfisbreytingar sem tryggja að einstakir sjóðir og sjóðfélagar þeirra verði ekki fyrir neikvæðum fjárhagslegum afleiðingum.
Umsögn sjóðsins í heild sinni má nálgast hér
frá lífeyrismál.is
